Palang Pintu FUKI : Adegannye!

Palang Pintu FUKI : adegan

Rombongan Al Faruki<“calon” Ketua FUKI> nyang dinahkodai ame Ridho, si jagoan kampung, dah sampe di depan halaman Al Habib (Al Anjaru). Mereka dihadang ame Palang Pintu Ketua FUKI “lama” nyang ade di bawah komando Chandra, mantan preman pasar yang dah tobat nashuha, insya Allah.

Belum tau cerite sebelumnya?? Baca di sini.

==============================================

Aktor :

pihak Ketua Lama (L) :

1. Jubir (Chandra) yang adu pantun, petentang-petenteng.

2. Ketua Lama (Anjar), “sok” bersahaja.

3. Pesilat (Ringo), pendekar kampung sebrang, songong, sok jago, pecicilan.

pihak “calon” Ketua Baru (B) :

1. Jubir (Ridho) yang adu pantun, petentang-petenteng.

2. “Calon” Ketua Baru (Faruk),” sok” cool,” sok” ganteng.

3. Pesilat (Indra). Calon Camatzz sejuta umat, sotoi, sok jago, cengengesan.

4. Qori’ (Aulia) yang tilawah, juara MTQ tingkat RT. Katanye bakal maju ke tingkat RW.

Sutradara : Agung

Asisten Sutradara : Yans

Naskah (diedit oleh Agung) : jodhi yudono di silatindonesia@yahoogroups.com

==============================================

Mau nonton pertunjukannye?? Liat di sini.

Adu Pantun

(Pihak ketua lama udeh ade di panggung.)

Narator (Agung): Berikut adalah drama satu babak ketika acara Palang Pintu FUKI berlangsung yang diwakili oleh pihak pengantin Perempuan, eh salah, pihak Ketua Lama (L) dan pihak Ketua Baru (B).

Bla…bla…bla…., la…la…la…, a*******t s********j x******x ******wrt, kjt********.

(Pihak Ketua Baru dateng…, dihadang ame Palang Pintu Ketua Lama)

L (Chandra) : Eh … Bang-Bang berenti! Bang, kaga denger ape luh…Eh… Bang nih ape maksudnye nih … selonong-selonong di kampung orang. Emangnye lu kagak tahu kalo nih kampung ade nyang punye?…

Eh… Bang, rumah gedongan rumah belande, pagernye kawat tiangnye besi, gue kaga mao tau nih rombongan datengnye dari mane mau kemane, tapi lewat kampung gue kudu permisi.

B (Ridho): Oh… jadi lewat kampung sini kudu permisi, Bang.

L: Lha..iye, emangnye lu kate ini tegalan?!

—————————————–

B: maafin aye Bang, kalo kedatengan aye ame rombongan kaga berkenan di ati sudare-sudare…Sebelomnye aye pengen ucapin dulu nih Bang…Assalamu’alaikum.

L: Alaikumussalam…

B: Begini Bang…makan sekuteng di Pasar Jumat, mampir dulu di Kramat Jati, aye dateng ama rombongan dg segale hormat, mohon diterime dengan senang hati.

L: Oh … jadi lu ude niat dateng kemari…?!eh…Bang, kalo makan buah kenari…, jangan ditelen biji-bijinye…kalo lu udeh niat dateng kemari…gue pengen tahu ape hajatnye?…

B:Oh… jadi Abang pengen tahu ape hajatnye…?emang Abang kaga di kasih tau ame tuan rumehnye…?

L: Lha…., pan gue tuan rumehnye?!…Begimane sih lu…!

B: (sambil nyengir) Oh, maap deh Bang. Aye lupe.

Gini Bang, ade sore ade pagi, ade bulan ade matahari, kalo bukan lantaran ketua FUKI, kaga bakalan nih laki aye anterin ke mari. (nyodorin Al Faruki agak ke depan dikit. Eh…Al Faruki-nye belagak sisiran+ngaca pake kaca spion).

EAA….H!!!

——————————————————

L: Oh… jadi lantaran jabatan ketua FUKI Abang kemari?!…Eh… Bang, kaga saleh Abang beli lemari, tapi sayang kaga ade kuncinye. Kaga salah abang datang kemari, tapi sayang tuh… jabatan ude ade yang punye. (sambil nunjuk ke Anjar) Nih, orangnye! (Al Habib <Al Anjaru> perlahan maju, begaye kaya sedang bedo’a…)

Aca…Aca…!!!

——————————————————

B: Oh…jadi tuh jabatan FUKI ude ade yang punye?!.. eh …Bang, kemenyan di kuburan cine, kuburan Islam aye yang ngajiin. Biar kate tuh jabatan udeh ade yang punye, tetep aje (nunjuk ke Al Faruki) nih laki bakal aye jadiin.

L: …Jadi elu tetep ngotot pengen jadiin. Eh … Bang, kalo jalan lewat kemayoran, ati-ati jalannye licin. Dari pade niat lu kaga kesampaian, lu pilih MATI ape lu batalin.

B: Oh… jadi Abang bekeras nih…?! Eh …Bang, ibarat baju udeh kepalang basah, masak nasi udeh jadi bubur, biar kate aye mati berkalang tanah, setapak kaga mungkin aye bakal mundur.

L: Oh… jadi lu tetep kaga mau mundur?!… Ikan belut mati di tusuk, dalam kuali kudu masaknye, eh… (sambil nunjuk ke seluruh Palang Pintu Ketua Lama) nih palang pintu kaga ijinin lu masuk, sebelum lu penuin persaratannye.

B: Oh…jadi kalo mao dapetin jabatan ketua FUKI ade saratnye, Bang…?

L : Ade…, jadi pelayan aje ada saratnye… apa lagi jadi Ketua FUKI…!

B: Kalo begitu… sebutin saratnye… Bang…

——————————————————

L: Lu pengen tau ape saratnye…kude lumping dari tangerang, kedipin mate cari menantu. Pasang kuping lu terang-terang, adepin dulu jago gue satu-persatu.

B: Oh… jadi kalo mao jadi ketua FUKI, saratnye jago bekelai Bang…

L: Iye … kalo lu takut, sono lu pulang…!

B: Bintang seawan-awan, aye itungin beribu satu, berape banyak Abang punya jagoan, aye bakal adepin satu-persatu.

==============================================

Adu Jurus

B : Bang, lu tau dalemnye rawa, pasti lu tau kali semanan, kalo mau tau namenye jawara, nih lu liat gue punye maenan!

(Pesilat Ketua Baru (Indra “Camatz”) jalanin jurusnya…., ).

B: Nih ….baru kembangnye Bang!…buahnye ntar …

L: Kalo lu mau tau…! Kelape ijo ditusuk belati, naek perahu lurus jalannye, udeh banyak jago yang mati, nih jurus… pukulannye.

(Pesilat Ketua Lama (Ringo) jalanin jurusnye)

L: kalo elu buahnye…

nih bijinye….

(Dua jagoan tadi berantem. Adu jurus, adu pukulan, bantingan, tendangan, sampe adu ceng-cengan.)

(Pesilat Ketua Baru (Camatz) menang setelah ngasih recehan ke Pesilat Ketua Lama (Ringo).)

(Kalau berantemnya dah kelar, dua jagoan balik ke kelompok masing2…)

=============================================

Adu Ngaji

B: Gimane Bang…rase-rasenye jagoan Abang udeh pade rontok semua nih…

Ape aye ame rombongan udeh boleh masuk?…ape masih ade saratnye lagi Bang?…

L: Ntar dulu Bang, enak aje… pan lu tau…

buah cereme jangan diasinin,makan nasinye di kandang kude. Sarat pertame emang lu ude penuin…, tapi masih ade sarat yang kedue…

B: Sebutin udeh bang, jangan lame-lame…

L: Tukang sate dagangnye malem, jalannye muter ke pasar kranji. Gue minta elu jangan cume bise berantem, tapi gue pengen denger lu bise ngaji….

Masa’ mau jadi ketua FUKI kaga’ bisa ngaji!

——————————————————

B: Eh Bang,….Tumbuk ketan jadinye uli, ulinye juge kudu ditapein. Betaun-taun anak kampung gue (ude pake kata “gue”, ude mulai songong…) bisa ngaji, lagu yang Abang minta aye (g konsisten…) bawain. Nih, jagoan aye Bang!

(Majuin Faruk…, Al Faruki maju dengan gaya cool.)

Al Faruki : Gini deh Bang,…Mau ke poncol, nyasarnye ke Beji, udah cape nih kote aye puterin. Mending kaga usah aye duluan yg ngaji.

Nih…, anak buah gue dulu… lu cicipin….

(Al Faruki nunjuk Aulia…(nyang dasarnya emang lebih jago ngaji dari Al Faruki). Aulia maju terus baca Quran dengan indah).

B: Gimane Bang… soal berantem aye udeh ladenin, soal ngaji Abang udeh dengerin. Ape aye ame rombongan udeh boleh masuk? Ape masih ade saratnye lagi, Bang…?

L: Cukup-cukup dah Bang…rase-rasenye kaga rugi jagoan Abang jadi ketua FUKI.

Soal silat Abang jago…soal ngaji Abang bise…aye Cuma bisa bilang…

buah mangga bukan sembarang mangga,

buahnye satu tulung petikin.

Aye bangga bukan sembarang bangga,

Ketua FUKI yang begini yang aye arep-arepin.

Ahlan wasahlan buat Abang ame rombongan…

Assalamu, alaikum…

Penonton : Wa alaikumussalam…. (plok…plok….plok……)